Okeanda choʻkmay qolgan Starship 75 kundan soʻng Texasga qaytdi
Hind okeaniga qoʻnganidan keyin suv yuzasida qolgan SpaceX’ning Ship 40 kosmik kemasi Texasga qaytarildi. Starship tizimining yuqori bosqichi boʻlgan apparatni Forte ogʻir yuk tashuvchi kemasi 7-oktabr kuni Braunsvill portiga olib keldi.
Okeanda cho‘kmay qolgan Starship 75 kundan keyin Texasga qaytdi
Ship 40’ning safari 24-iyulda boshlangan: Starship transport tizimi SpaceX’ning Texasdagi kosmodromidan uchirilgan edi.
Parvozning asosiy vazifalarini bajargach, apparat boshqariladigan tarzda atmosferaga qayta kirib, Hind okeaniga qo‘ngan. Ammo kutilganidek parchalanib yoki tezda cho‘kib ketmagan — u suv yuzasida qolib, oqim bo‘ylab siljishda davom etgan.
Kosmik parvoz va suvga qo‘nishdan keyin saqlanib qolgan apparat kompaniya uchun qo‘shimcha o‘rganish imkonini yaratgan. SpaceX uni quruqlikka qaytarishga qaror qilgan.
Muhandislar Ship 40’ni tekshirish orqali uning konstruksiyasi atmosferaga qaytish va okeanga qo‘nish jarayonlarini qanday o‘tkazganini batafsil o‘rganishi mumkin.
Ship 40 yarim cho‘kuvchi Forte og‘ir yuk tashuvchi kemasiga ortilgan. Bunday kema yuk olish vaqtida palubasini qisman suv ostiga tushiradi. Yuk paluba ustiga keltirilgach, kema yana ko‘tarilib, uni suvdan chiqaradi.
Forte apparatni Hind okeani orqali olib o‘tib, Afrikani aylanib o‘tgan va Atlantika okeani orqali Texasga yetkazgan.
24-iyuldagi parvozdan 7-oktabrda Braunsvill portiga qaytishgacha taxminan 75 kun o‘tgan. Bu muddat apparatning okeanda qolishi, uni olib chiqish va dengiz orqali tashish jarayonlarini qamrab oladi.
Ship 40 portdan SpaceX’ning Starbase — «Yulduzli baza» majmuasiga olib boriladi. U yerda apparat parvozdan keyingi tekshiruvlardan o‘tkaziladi.